തെറ്റിയ വഴികൾ

 അന്നൊക്കെ..നിന്നെത്തിരഞ്ഞ്

തിരഞ്ഞു ഞാൻ പോയി..,

പിന്നീടെപ്പൊഴോ

തെറ്റാൻ മറന്നൊരുവഴിയുടെ അറ്റത്ത്

എന്നെത്തന്നെ കാണാതായി..

മടക്കുകളിൽ വിള്ളൽ വീണ

 വാക്കുകളുടെ പുസ്തകം

ഞാനും നീയും ഇപ്പോൾ തുറക്കാറില്ല.. ,

തുറന്നപ്പോഴൊക്കെ ഇടിമിന്നലായി

 തോരാതെ പെയ്തപേമാരികൾ

ഓർമ്മയിലുള്ളത് കൊണ്ടാവണം … !

ഇടനെഞ്ചിലലയടിച്ച കടലിന്റെ

ഇരമ്പം എപ്പോഴാണ് ശമിച്ചത്?

അലയടങ്ങിപ്പോയിട്ടും മറക്കാതെ,

വേലിയേറ്റങ്ങൾക്കെല്ലാം

 ഇറക്കങ്ങളുമുണ്ടായി..

എങ്കിലും,

ഏറ്റത്തിരകളിലടർന്നകടൽ ഭിത്തികൾ 

പിന്നീടൊരിക്കലും മുറികൂടിയില്ല.

വറ്റിപ്പോയ ഉറവകൾ തേടി

ഇന്നോളം അലഞ്ഞ കാടുകൾ

ഇപ്പോൾ മറ്റാരുടേതോ ആണ്

നേരത്തെ കിനിച്ചിലുകളിൽ

ചുണ്ണാമ്പ് ചേർത്ത് വിടവടച്ച

അണക്കെട്ടുകളിലെല്ലാം 

കാലത്തിൻറെ മന്ത്രവാദം ! 

തിരകൾ തീർന്നു പോയ സമുദ്രങ്ങൾ 

കാറ്റ് പുതച്ച് ഉറങ്ങിപ്പോയതും

നങ്കൂരങ്ങളിൽ പവിഴപ്പുറ്റ് വളർന്ന

കപ്പലുകളിൽ കടൽ വന്നുനിറഞ്ഞതും 

ഉടല് വേവാൻ തുടങ്ങിയ  

രാത്രിയോളം മറ്റാരറിയാൻ ! 

കാട്ടുതെച്ചികൾ കൂട്ടംതെറ്റി വിരിഞ്ഞ

നാട്ടുവഴികളിൽ വാപിളർന്ന മാളങ്ങൾ

അധോലോകങ്ങളിൽ ആരുമറിയാതെ പടയോട്ടങ്ങൾക്ക് വഴിയൊരുക്കി